分卷阅读118(4/5)

    「Daniel！我哋两个人映一张？」Michelle交咗紥花俾我，我同佢同时望住镜头。唯一一个无毕业袍嘅我，好似终於有一张相系无咁突出。「哗，咁多年後，我哋呢个Supernova组合终於又合体」

    「系喎，我哋以前有join过」

    「记唔记得当年我哋唱咩歌啊？」

    「记得，Someone like you呀嘛」记得，因为系我拣嘅。

    「你嗰日啊，病到癫咗都夹硬去，我几惊你顶唔顺啊」

    「青春啊嘛?」

    走廊嘅灯喺假日并无开哂，喺少少幽暗嘅尽头留底窗口透入嚟嘅光。一间间特别室排喺课室对面，等紧久违嘅人拜访。Musi有声音虚弱喺我嘅耳膜附近震荡，系铜钹铿锵嘅声。

    「ok，嚟多次」鼓棍交叉嘅撞击确立咗一早注入我肌肉记忆嘅节奏。结他加入敲击乐器，我心入面都默念住拍子。电子琴暗哑嘅和弦轻轻咁隐藏自己喺人声同结他底下，未背好谱嘅我望住手机，D min minor，B flat，C。我细声咁加入Hugo高亢嘅音域，协和佢嘅声线，手入面来回?住几个琴键。Fun.嘅歌，我一直放喺手机入面，但好耐都无听过。

    「我觉得tempo ok，keyboard都ok?我知chorus嗰度可能复杂啲，你使唔使?」

    「我ok啊」

    手握结他嘅Hugo留低咗多阵喺band room入面，佢啲friend一早就走咗，得返我同佢练和音嘅部分。我同佢拎住写咗少少笔记嘅歌词，听住我哋两个把声协调咁叠埋一齐，令我唔小心miss咗一拍。

    「其实你都唱得几好啊，你可以去参加吓supernova」佢嘅右手搭喺我左边嘅膊头，已经系我哋嗰时最亲密嘅接触。

    「真心咩？」

    「真呀，我会嚟睇?」

    「你下年都grad啦」

    「咁上网睇罗」

    我同佢好似咩都无发生过咁，好似，我无喺SU同佢讲过嗰番话。我以前会以为系因为我自己唔舍得佢，所以先至咁努力将一切回复正常，但呢排，我又谂，嗰时其实系咪唔止我一个咁谂？

    碎雨敲落玻璃窗同冷气机上面嘅声音盖过band room practice，当年我同Michelle都一齐花咗好多时间准备我哋喺supernova首歌。就算最後果日我病咗，我都梗躝屍都躝去唱，我无同佢讲点解，净系同佢讲，最後一年，点都要去。

    「哗，而家已经变成咁啦？」Michelle探个头入去音乐室入面，对住我讲。

    「系啊！老啦我哋，开始发现啲嘢变得太快。」

    「系啊，初老症状啊。唔再系以前中学鸡咁啦。」

    「连部琴，我都好少掂啦」啊妈已经问起好多次，几时可以掉咗屋企部琴佢。

    「好似，过咗中学之後，大家都同音乐脱离咗关系。」

    佢哋映完相，都差唔多时间去食中午饭。但唔知点解，咁耐无返嚟嘅我，想喺度留耐啲。我又行返返去礼堂嘅门口，望住完全黑哂嘅礼堂。我喺呢间学校嘅第一日同埋最後一日，都系呢度过。但系喺呢个台上面，有更多比开学礼同毕业礼更重要嘅事发生过。

    「唔使紧张喎，」喺後台嘅Hugo拍一拍我嘅左边膊头，稍稍gel咗头嘅佢喺今日呢啲特别嘅日子好似特别醒神，眼角都好似比平时更多一重傲然嘅气势。「平时咁就得啦，黄金左手」

    我企喺佢左边嘅位置，黑色嘅电子琴接驳住电线，我手指已经架好喺第一个chord，等待鼓棍嘅指示。台下嘅欢呼声大部分都系向住最後一次喺呢个台上面表演嘅Hugo。纯白色嘅恤衫有少少未摄好入贴身嘅西裤入面，有少少松嘅领肽令佢个人睇落有少少rock味，但仍然无损佢黑色西装褛嘅气派。毕竟都已经系成晚嘅压轴表演，大家嘅仪容比喺一开始都已经无咁姿整。

本章尚未完结,请点击下一页继续阅读---->>>