分卷阅读13(3/3)

    我地回到自己嘅摊位，等候大会公布最终结果。Alvin效率奇高，已经将相片传入电脑。成班热血男孩比赛後意犹未尽，挤埋一齐围住睇相，不时互相调笑，见到自己全力以赴嘅样子，又不禁自豪起来。大家睇相正睇得兴奋雀跃之际，我抬头一望，想搵Jerry赞佢几句，但却不见佢嘅踪影。

    「Will。」转身一看，原来系Tom。「我想同你倾几句。」

    我点点头，同佢走到一处较少人嘅地方。

    阵阵海风吹来，似在温柔地轻抚海边嘅人。身处在如此舒服自在嘅环境，我不期然也转动一下手臂，舒缓紧紧嘅膊头。我问：「无咩事呀嘛？」

    龙舟队班仔再次传出一阵喧哗声。Tom回望一眼，勾起嘴角微笑说：「Will，班新仔你带得好好。龙舟队後继有人，我可以放低心头大石喇。」Tom已经final year了，学业压力不少，但对队长嘅职责没有丝毫松懈，依然时刻记挂住龙舟队嘅将来。「同埋好彩遇到Jerry，令我地更上一层楼。」

    我递上一盒柠檬茶说：「份内事啫，而且Jerry都好乐意。你做队长要兼顾咁多大小事务，重要时刻鼓励队员，咪重辛苦。」

    Tom一边将饮管拆出来，一边说：「Will，我又要读书，又要带队，你知唔知我系点样做到？」呢个问题我都好好奇，摇头示意。佢静静地啜了一啖柠檬茶，慢慢呼了口气：「因为我有Rachel。无论系咩事情，佢都会支持我。」

    如果呢句说话由其他人讲，或许会系放闪，但我唔认为Tom会无缘无故咁做，佢一定有佢想表达嘅讯息。佢继续说：「Will，你系一个做事认真而且可靠嘅人。你从来唔会怪责人哋唔好，只会谂自己唔够好。所以，你系一个好优秀嘅运动员，但你记住，好多野唔可以一个人自己顶。」

    「嗯，我明白。」Tom不愧系队长，一说便说中了我性格。

    「可以的话，我希望你下年可以接棒做队长。不过你慢慢考虑，唔急嘅，我亦唔会勉强你。我只系想你知道，你比你自己所想的更有实力同魅力。只要你开声，必定有很多人支持你。」

    我摸摸後颈，唔知应该点样回应好。别人对我嘅信心，总比我对自己嘅还要多。

    Tom又将我看穿了，笑说：「唔使妄自菲薄，人地榄球队队长Jerry同大明星Alvin都比你号召到，你仲话你唔系有魅力？」

    「YEAH！！！」突然，一阵比之前更响亮、更激动嘅欢呼声从後响起，吸引了附近其他队伍和路人嘅目光。龙舟队所有成员从摊位奔到我同Tom身边。众人欢喜雀跃，放声欢呼，不时互相拥抱。「我地全场总冠军呀！！！」我和Tom在狂跳狂嗌嘅人群中交换了一个眼神，对视一笑。对佢嘅信任，我非常感激，而佢亦知道。

    咔嚓、咔嚓。

    班仔手舞足蹈，嗌到傻晒，十足青山走犯咁。在人群外围嘅Alvin连忙为我地影相，捕捉呢个欢腾嘅一刻。我当然唔会让佢落单啦。几经辛苦，顺利穿过人群走到Alvin身边，说：「多谢你黎呀！」

    「？」Alvin一脸不解。太吵了，喧哗声完全盖过我嘅说话。

    我以更大的声线重覆说：「我话，多谢你黎呀！」

    Alvin再次摇头，伸手搭住我膊头围住我条颈，侧头示意我靠近些再说一遍。我下意识地揽住了佢条腰，将佢整个人拉近，鼻尖微微扫到佢耳边，说：「Alvin，多谢你黎呀！」

    Alvin可能被我突然嘅举动吓亲，揉一揉瞬间通红嘅耳仔。片刻之後，哄埋我脸旁。一阵热气袭来：「餐饭，我等你请。」

    《第6章：超级龙舟赛（上）》完

    其实，要写纯碎搞野嘅甜故唔难，求其所谓「大只男X」、「大只男Y」搞到天昏地暗就成一篇文了。虽然我唔系要写文学巨着，但我仍然期望笔下嘅角色有自己嘅性格同经历。咁样先系写故事嘛，至少，有甜嘅部分大家会再投入啲啦。

    最後，补充一句：最近小弟工作有点忙，已经尽快赶稿，要大家久等真的不好意思。请见谅。

本章已阅读完毕(请点击下一章继续阅读!)